Севги, муҳаббат... шариатда мумкинми?

Севиш ва муҳаббат қўйиш шариатда ҳаром саналадими?

Муҳаббат исломда шарафланади ва унга чақирилади. Аллоҳ таоло айтади: "Одамлар ичида Аллоҳдан ўзга тенгдошларни тутадиганлар ва уларни Аллоҳни севгандек севадиганлар бор. Иймон келтирганларнинг Аллоҳга муҳаббатлари қаттиқдир" ("Бақара" сураси, 165-оят).

Абу Ҳурайра розияллоҳу анҳудан ривоят этилишича, Расулуллоҳ соллаллоҳу алайҳи ва саллам айтдилар: "Аллоҳ таоло Қиёмат куни дейди: "Менинг Жалолим-Буюклигим йўлида бир-бирини севганлар қаерда? Бугун мен уларни, Менинг соямдан бошқа соя йўқ бу кунда, Ўз соям билан соялантираман!" Яна Абу Ҳурайра розияллоҳу анҳудан ривоят этилишича, Пайғамбар соллаллоҳу алайҳи ва саллам айтдилар: "Жоним қўлида бўлган Зотга қасамки, то иймон келтирмагунча жаннатга кирмайсизлар. То бир-бирингизни севмагунча иймон келтирмайсизлар. Агар уни қилсангиз бир-бирингизни севиб қоладиган амални кўрсатайми? Ўрталарингда саломни ёйинглар!". Мазкур икки ҳадисни имом Муслим ривоят қилганлар.

Муоз ибн Жабал розияллоҳу анҳудан ривоят этилишича, Набий соллаллоҳу алайҳи ва саллам айтдилар: "Аллоҳ азза ва жалла дейди: "Менинг Жалолим-Буюклигим йўлида бир-бирини севганлар учун нурдан бўлган минбарлар бор.  Уларга пайғамбарлар ва шаҳидлар ҳавас қиладилар". Имом Термизий ривоят қилиб, ҳасан, саҳиҳ ҳадис, деганлар. Ибн Аббос розияллоҳу анҳумодан ривоят этилишича, Пайғамбар соллаллоҳу алайҳи ва саллам дедилар: "Аллоҳ таолони, сизга неъматларидан едириб қўйгани учун севинг! Мени Аллоҳнинг муҳаббати сабабидан севинг ва аҳли байтимни эса менга қўйган муҳаббатингиз учун севинг!" Термизий ривоятлари.

Мусулмон Аллоҳ яратган ҳамма нарсани севади. Қаерда бўлмасин, гўзаллик кўради. Қандай қилиб бўлмасин, муҳаббатни тарқатади. У одамларга раҳмат ўлароқ яхшилик қилади, меҳрибонлик қилади ва уларга эзгулик соғинади. Бунда улар Аллоҳ таоло: "Биз сизни оламларга раҳмат ўлароқ юбордик" ("Анбиё" сураси, 107-оят) ва "Албатта сиз гўзал хулқ узрасиз" ("Қалам" сураси, 4-оят) дея тавсифлаган Пайғамбарлари Мустафо соллаллоҳу алайҳи ва салламга эргашишади.

Демак севги ва муҳаббат ҳаром ҳисобланмайди. Илло бу покиза ва юксак маъно билан севги-муҳаббат даъвоси ила икки жинс орасида жорий бўлган ҳаром алоқалар, шаҳват ортидан кўрларча эргашишлар ва жасад лаззати ортидан ҳарсиллаб чопишлар орасини аралаштириб юбориш жоиз эмас. Буни шариат ҳаром қилган. Шариат нимани ҳаром этса, ўрнига ҳалол муқобилини таклиф этади. Икки жинс ўртасидаги алоқа ва муҳаббатнинг ҳалол ечими - никоҳ, турмуш қуришдир. Муҳаббат дардига йўлиққан киши севганига никоҳ билан етишгунча ҳолини ҳаммадан яширсин.

Валлоҳу аълам.

Мубашшир Аҳмад