Tinchlik va xotirjamlik ne’matining ahamiyati, uni asrab-avaylash

   Bismillahir Rohmanir Rohiym. Bizni tinchlik ne’mati bilan mukofotlagan Allohimizga cheksiz hamdlar, payg’ambarimiz Muhammad Mustafoga adoqsiz salovatu salomlar bo’lsin. Tinchlik bizga berilgan eng oliy ne’matlardandur. Uning  qadriga esa hammamiz ham yetib, ahamiyat qilavermaymiz. Bu haqda payg’ambarimiz sollallohu alayhi vassallam:

“Ikki ne’mat borki, ko‘pchilik insonlar uning qadriga yetmaydilar. U – xotirjamlik va sihat-salomatlik”. (Imom Buxoriy va Imom Termiziy).

   Demak, bundan bilsak bo’ladiki xotirjamlik, ya’ni tinch bo’lishimiz, bizning sog’-salomatligimiz, ming afsuski har doim ham qadriga yetavermaydigan ne’matlarimizdan ekan. Insonlarga xos bu odat, ya’ni biror bir narsaga ehtiyoji tushmaguncha uni yod etmaslik bor. Biz to kasal bo’lmas ekanmiz sog’ligimiz qay darajada qimmatbaho ne’mat ekanini, toki bizga balo-ofat va notinchlik yetmaguncha tinch ekanimizni qadri naqadar ulug’ ne’mat ekanini anglolmaymiz.

 Alloh taolo ham o’z oyati karimasida:

“Jahannam uchun jinlar va insonlarning ko‘pchiligini yaratganmiz. Ularda qalblar bor, (lekin) ular bilan «anglamaydilar». Ularda ko‘zlar bor, (lekin) ular bilan «ko‘rmaydilar». Ularda quloqlar bor, (lekin) ular bilan «eshitmaydilar»*. Ana o‘shalar hayvonlar kabidirlar. Balki, ular (yanada) adashganroqdirlar. Aynan o‘shalar g‘ofillardir” (A’rof  surasi, 179-oyat)

beparvo  g’ofil bandalari haqida shunday degan.  Bundan ko’rinib turibdiki nafaqat tinchlikni qadriga yetish, balki uni asrab-avaylashimiz har bir birimizga lozim tutilganini bilib olsak bo’ladi. Oiladan jamiyat, jamiyatdan xalq, xalqdan davlatimiz yuzaga kelar ekan, xalqimizning duo va hikmatli gaplarida ham tinchlik ne’mati ko’p yod etilganini bilamiz. Bu bizga azal-azaldan dinimiz orqali singib kelgan tushunchadir.

 Payg’ambarimiz sollallohu alayhi vasallamdan keladigan bir qancha hadislarda:

“Bir-biringizning qoningiz va obro‘yingizni to‘kishingiz, mol-mulkingizga tajovuz qilishingiz barchalaringizga haromdir” (Imom Muslim rivoyati).

 “Hech kim birodariga qurol o‘qtalmasin, chunki shayton vasvasa qilib jahannam qa’riga yetaklayotganini bilmay qolishi mumkin”

 “Men vafot etganimdan so‘ng bir-birlaringizning bo‘g‘ziga tig‘ uradigan kofir bo‘lib ketmanglar”, deyilgan. (Imom Buxoriy rivoyati)

deyiladi. Bu hadisi-shariflardan ko’rinib turibdiki tinchlik avvalo har bir insonning o’zidan boshlanib, uni saqlab qolish ham bizga bog’liq ekan. Shunday ekan avvalam bor o’zimizni isloh qilaylik azizlar!